ပြည်သူ၁၀ဦးကိုရက်စက်စွာ -တ်ခဲ့တဲ့ဗိုလ်မှူးစိုးဝင်းထိုက်ဂန့်

လိုင်လင်းပီမြို့သိမ်းတိုက်ပွဲတွင် မတူပီဒေသခံ ၁၀ ဦးကို ရက်ရက်စက်စက်သတ်ဖြတ်ခဲ့သော ဗိုလ်မှူးစိုးဝင်းထိုက် သေဆုံး

ဧရာဝတီတိုင်းမ်

(လိုင်လင်းပီ)၊ နိုဝင်ဘာ ၂၅ ရက်

ချင်းပြည်နယ်၊ မတူပီမြို့နယ်တွင် ၂၀၂၂ခုနှစ်၊ ဇန်နဝါရီလက အသက်မပြည့်သေးသည့် ကလေးငယ်တစ်ဦးအပါအဝင် ဒေသခံအရပ်သား ၁၀ ဦးကို ရက်ရက်စက်စက်သတ်ဖြတ်ခဲ့သည့်ဖြစ်စဉ်တွင် အဓိကပါဝင်ခဲ့သော ဗိုလ်မှူးစိုးဝင်းထိုက်သည် ယမန်နေ့၊ နိုဝင်ဘာ ၂၄ ရက်နေ့၊ လိုင်လင်းပီမြို့သိမ်းတိုက်ပွဲတွင် သေဆုံးကြောင်းသိရသည်။

လိုင်လင်းပီမြို့ရှိ စစ်ကောင်စီတပ်စခန်းကို ချင်းအမျိုးသားတပ်မတော်နှင့် ချင်းကာကွယ်ရေးတပ်ဖွဲ့များက နယ်မြေရှင်းလင်းမှုပြုလုပ်ရာတွင် ဗိုလ်မှူးစိုးဝင်းထိုက်၏ အလောင်းကို တွေ့ရှိခဲ့ခြင်းဖြစ်သည်။

“အဲ့ဒီတုန်းက တာဝန်ရှိပုဂ္ဂိုလ်ပေါ့နော်။ မတူပီမြို့အခြေစိုက် ခမရ ၃၀၄ ရဲ့ ဒုတပ်ရင်းမှူးပေါ့နော်။ အဲ့ဒီအချိန်မှာ စစ်ကြောင်းမှူးက အခုသေသွားတဲ့ ဗိုလ်မှူးပဲ။ သူကိုယ်တိုင်ဦးစီးပြီးတော့ စစ်ကြောင်းလုပ်နေတာ။ အပြစ်မဲ့ဒေသခံအရပ်သား ၁၀ ဦးကို လူမဆန်စွာ ရက်ရက်စက်စက်သတ်တယ်။ တကယ်ဆိုအရပ်သားပြည်သူတွေကို ပစ်မှတ်ထားပြီးလုပ်သွားတာ”ဟု ချင်းလူ့အခွင့်အရေးအဖွဲ့အစည်း (CHRO)၏ File ဒါရိုက်တာ ဆလိုင်းတေရက ဧရာဝတီတိုင်းမ်ကို ပြောကြားသည်။

ထို့အပြင် ဗိုလ်မှူးစိုးဝင်းထိုက်သည် လိုင်လင်းပီမြို့တွင် တာဝန်ထမ်းဆောင်နေစဉ် ဒေသခံများ၏ ပစ္စည်းများကို တန်ဖိုးမပေးဆောင်ဘဲ အခမဲ့ယူခြင်း၊ ၎င်းလက်အောက်ခံ တပ်ဖွဲ့ဝင်များကို မတူပီမြို့ ဒေသခံများ၏ နေအိမ်များကို ဖောက်ထွင်းခိုင်းခြင်းနှင့် ပစ္စည်းခိုးယူခိုင်းခြင်းတို့ကို အမိန့်ပေးစေခိုင်းခဲ့ ကြောင်းသိရသည်။

ပြီးခဲ့သည့် ၂၀၂၂ခုနှစ်၊ ဇန်နဝါရီလတွင် ဗိုလ်မှူးစိုးဝင်းထိုက်ဦးဆောင်သော စစ်ကြောင်းသည် မတူပီမြို့မှ ရေဇွာမြို့သို့ စစ်ကြောင်းထိုးလာစဉ် မတူပီမြို့နယ်၊ ငလိုင်ကျေးရွာ၊ ကီလှုန်းကျေးရွာ၊ ကစဲ၊ စောင်ထီယား၊ တီပေါနှင့် လုံလှောရှိ အပြစ်မဲ့‌ဒေသခံ ၁၀ ဦးကို ဖမ်းဆီး၍ ရက်ရက်စက်စက်သတ်ဖြတ်ခဲ့ပြီးနောက် ၎င်းကျေးရွာများရှိ ဒေသခံအားလုံး မီဇိုးရမ်ပြည်နယ်ဘက်သို့ ထွက်ပြေးတိမ်းရှောင်ကြရခြင်း ဖြစ်သည်။

မီဇိုးရမ်ပြည်နယ်ဘက်သို့ ထွက်ပြေးတိမ်းရှောင်နေကြရသော အဆိုပါကျေးရွာများမှ ဒေသခံများသည် လက်ရှိအချိန်ထိ နေရပ်မပြန်နိုင်သေးသလို ချင်းပြည်နယ်အတွင်းတွင် စစ်ကောင်စီက လေကြောင်း တိုက်ခိုက်မှု အပါအဝင် အခြားလူ့အခွင့်အရေး ချိုးဖောက်မှုများကြောင့် ဒေသခံအရပ်သား သေဆုံးဒဏ်ရာရရှိမှု မြင့်တက်နေဆဲဖြစ်ကြောင်း ချင်းလူ့အခွင့်အရေးအဖွဲ့ထံမှ သိရသည်။

ဓာတ်ပုံ-ဗိုလ်မှူးစိုးဝင်းထိုက်စစ်ကြောင်းက ရက်ရက်စက်စက်သတ်ဖြတ်ခဲ့သော မတူပီဒေသခံ ၁၀ ဦး

Be the first to comment

Leave a Reply

Your email address will not be published.


*