မြောက်ဦးခရိုင်ရဲစခန်းကို AA သိမ်းပိုက်
——————
ရခိုင်ပြည်နယ်၊ မြောက်ဦးမြို့နယ် မြောက်ဘက်ရှိ မြောက်ဦးခရိုင်ရဲစခန်းကို အပြီးသတ် သိမ်းပိုက်နိုင်ခဲ့သည်ဟု ရက္ခိုင့်တပ်တော် (AA) က ယနေ့ (ဒီဇင်ဘာ ၂၇) မြန်မာစံတော်ချိန် နံနက် ၁ နာရီတွင် သတင်းထုတ်ပြန်သည်။
နှစ်ဖက်အသေအပျောက်နှင့် လက်နက်ခဲယမ်းသိမ်းဆည်းရရှိမှု အပါအဝင် အသေးစိတ်အချက်အလက်များတော့ AA ၏ထုတ်ပြန်ချက်တွင် မပါဝင်ပါ။
ဒီဇင်ဘာလ ၂၄ ရက်နေ့ နံနက် ၄ နာရီတွင် ငွေတောင်ပေါက်တံတားအနီးရှိ ရဲစခန်းနှင့် သူတော်မတောင်ကုန်းစခန်းတို့ကို AA က ဝင်တိုက်ရာမှ မြောက်ဦးမြို့တွင် တိုက်ပွဲစတင်ဖြစ်ပွားခြင်းဖြစ်သည်။
ဒီဇင်ဘာ ၂၄ မှ ယမန်နေ့ ဒီဇင်ဘာ၂၆ အထိ ၃ ရက်တာအတွင်း မြောက်ဦးအခြေစိုက်စစ်ကောင်စီတပ်များက အရပ်ဘက်ပစ်မှတ်များကို လက်နက်ကြီးဖြင့် ပစ်ခတ်မှုကြောင့် ဒေသခံ ၉ ဦး သေဆုံး၊ ၁၆ ဦးထက်မနည်း ထိခိုက်ဒဏ်ရာရရှိသည်ဟုလည်း AA ၏ ထုတ်ပြန်ချက်တွင် ဖော်ပြသည်။
ဒီဇင်ဘာ ၂၅ (ခရစ္စမတ်နေ့) နံနက်ပိုင်းကလည်း စစ်ကောင်စီတပ်က မြောက်ဦးမြို့ ရှေးဟောင်းသုတေသနပြတိုက်ကို လက်နက်ကြီးဖြင့် ပစ်ခတ်မှုကြောင့် ရှေးဟောင်းအမွေအနှစ်များ ပျက်စီးသွားပြီး ထိုပစ်ခတ်မှုသည် စစ်ကောင်စီ၏ ရည်ရွယ်တိုက်ခိုက်မှုဖြစ်သည်ဟု ရက္ခိုင့်တပ်တော် (AA) က နေ့ချင်း သတင်းထုတ်ပြန်သည်။
စစ်ကောင်စီကမူ ၎င်းတို့လက်ချက်မဟုတ်ဟု ယမန်နေ့ (ဒီဇင်ဘာ ၂၆) ထုတ် ဝါဒဖြန့် သတင်းစာများတွင် ငြင်းသည်။
မြောက်ဦးရှိ ရဲစခန်းနှစ်ခုကို AA က ရှော့တိုက်ဒုံး၊ လက်နက်ကြီးဖြင့် ပစ်ခတ်တိုက်ခိုက်မှုကြောင့် ယဉ်ကျေးမှုပြတိုက်နှင့် ကျောက်စာချပ်များပျက်စီးသည်ဟု စစ်ကောင်စီက ဆိုသည်။
ကမ္ဘာ့ယဉ်ကျေးမှုအမွေအနှစ်စာရင်းဝင်အဖြစ် တင်သွင်းထားသည့် ရှေးဟောင်းသမိုင်းဝင်အမွေအနှစ်များ ပျက်စီးဆုံးရှုံးခဲ့ရသည့် လက်သည်မှာ မြောက်ဦးမြို့အခြေစိုက် အမှတ် ၅၄၀၊ ၃၇၇၊ ၃၇၈ ခြေမြန်တပ်ရင်းနှင့် အမှတ် (၃၁) ရဲတပ်ရင်းတို့သာ ဖြစ်သည်ဟု ULA/AA က ဒီဇင်ဘာ ၂၅ ထုတ်ပြန်ချက်တွင် ဆိုထားပြီး ထိထိရောက်ရောက်တုံ့ပြန်မည်ဟုလည်း ပြောသည်။
ရက္ခိုင့်တပ်တော် (AA) က ၁၀၂၇ စစ်ဆင်ရေးကို ရခိုင်ပြည်နယ်နှင့် ချင်းပြည်နယ် ဒေသတချို့တွင် နိုဝင်ဘာလ ၁၃ ရက်နေ့တွင် စတင်လိုက်ပြီး စစ်ရေးအရ အရေးပါသည့် ဗျူဟာစခန်းများကို တိုက်ခိုက်သိမ်းပိုက်ထားသည်။
AA သည် ချင်းပြည်နယ် ပလက်ဝမြို့နယ်အတွင်းရှိ ‘ခဝဲဗျူဟာကုန်း’ ကိုလည်း အပြီးသတ်သိမ်းယူနိုင်ရေး ထိုးစစ်ဆင်လျက်ရှိသည်ဟုလည်း ထုတ်ပြန်ချက်တွင် ထည့်သွင်းရေးသားထားသည်။
