ကိုယ်လုပ်မှကိုယ်စားရသူတွေကြည့်ထား

စစ်မှုထမ်းဥပဒေ အတည်ပြုပြီးနောက် ပြည်ပထွက်ခွာမည့်သူ များပြားသဖြင့် နိုင်ငံခြားငွေ ဝယ်လိုအား မြင့်လာသလို ရွှေဈေးပါ တက်လာသဖြင့် ဖေဖေါ်ဝါရီ ၁၉ ရက်မှစ၍ လုပ်ငန်းရှင်များကို ခေါ်ယူစစ်ဆေးနေကြောင်း သတင်းရသည်။

ဖေဖေါ်ဝါရီ ၉ ရက် အမေရိကန် ၁ ဒေါ်လာဈေးမှာ ၃၅၀၀ကျပ် ပေါက်သော်လည်း ယနေ့ ကျပ် ၃၆၀၀ ကျော်ဖြစ်လာပြီး အကယ်ဒမီ အခေါက်ရွှေ ၁ ကျပ်သားမှာ ၃,၈၅၀,၀၀၀ ကျပ် မှ ၃,၉၀၀,၀၀၀ ကျပ် ဝန်းကျင်အထိ မြင့်လာခြင်း ဖြစ်သည်။

ထို့အတွက် ရန်ကုန်မြို့ရှိ နိုင်ငံခြားငွေလဲလှယ်ရေးလုပ်ငန်းရှင် ၅ ဦးနှင့် ရန်ကုန်နှင့် မန္တလေးမှ နာမည်ကြီး ရွှေဆိုင်ပိုင်ရှင်များ အပါအဝင် လုပ်ငန်းရှင် ၃၀ခန့်ကို အာဏာပိုင်များက စစ်ဆေးမေးမြန်းမှုများ ဈေးကွက်အတွင်းမှ သိရသည်။

ရန်ကုန်မြို့မှ နိုင်ငံခြားငွေ လဲလှယ်ရေးလုပ်ငန်း လုပ်နေသူတဦးက “ဈေးတက်တာတော့ စစ်သားခေါ်ယူမှု ကိစ္စတွေကြောင့် လို့ ပြောတယ်။ အကြောင်းပြချက် ခိုင်ခိုင်လုံလုံ မရှိပေမယ့် ရွှေသမား၊ အစိမ်းသမားတွေ အဖမ်းအဆီး ရှိတယ်။ တနင်္လာ နေ့ ထဲက ဖမ်းတာဆိုတော့ အစိမ်းသမား ၅ ယောက်လောက်တော့ ရှိပြီ”ဟု ဧရာဝတီသို့ ပြောသည်။

ယင်းအခြေအနေများကြောင့် ဈေးကွက်အတွင်း အရောင်းအဝယ်အေးသွားပြီး ပြည်ပထွက်ခွာသည့်သူများသာ ဝယ်ယူနေ ကြောင်း ၎င်းက ပြောသည်။

ဆက်လက်၍ ၎င်းက “ဝယ်တဲ့သူကလည်း သူ့အတိုင်းအတာနဲ့ သူ ဝယ်နေတယ်။ ရောင်းတဲ့သူကလည်း ဈေးကိုတက် တက်ပြီး ရောင်းသွားတယ်။ ဒါပေမယ့် ဟွန်ဒီဈေးကွက်အနေနဲ့ အရောင်းအဝယ် သိပ်မဖြစ်ဘူးပေါ့။ အဖမ်းအဆီးရှိနေတော့ လုပ်လို့ မရဘူး။ ဈေးတက်တာက ပြည်ပထွက်တဲ့သူတွေ ဝယ်တာကြောင့်လည်းပါတယ်”ဟု လက်ရှိအခြေအနေကို ပြော သည်။

စစ်တပ်အာဏာသိမ်းပြီးနောက် ကျပ်ငွေတန်ဖိုး ဆက်တိုက်ကျဆင်းနေသလို စစ်ကောင်စီဘက်မှ မူဝါဒ အပြောင်းအလဲ တခုခု ထုတ်ပြန်သည့်အချိန်အတိုင်း ဈေးတက်လေ့ရှိကြောင်း ငွေလဲလုပ်ငန်း လုပ်ကိုင်သူများထံက သိရသည်။

အလားတူ ထိုင်းဘတ်ငွေဈေးကွက်တွင် မြန်မာငွေကျပ်တန်ဖိုး ကျဆင်းနေပြီး ထိုင်းဘတ်ငွေ မြင့်တက်လာကြောင်း သိရ သည်။

ထိုင်းဘတ်လဲလှယ်ရေး လုပ်ဆောင်နေသူတဦးက “အခုရက်ပိုင်းမှာ ကျပ်ငွေက ကျတယ်၊ ကျပ်ကနေ ဘတ်လဲရင် မြန်မာ ငွေ ၁ သိန်းကို ထိုင်းဘတ် ၁၀၀၅ ဘတ် လောက်ပဲ ရှိတယ်။ စစ်မှုထမ်းဥပဒေ ကြေညာချက် မထွက်ခင်က ကျပ် ၁ သိန်းကို ဘတ် ၁၀၂၀ လောက်ရှိတယ်။ အရောင်းအဝယ်ကတော့ နည်းနည်းပိုသွက်နေတယ်၊ ဒီဘက်လာမယ့်သူတွေ များတာ လည်း ပါတာပေါ့”ဟု ပြောသည်။

စစ်မှုမထမ်းလိုသည့် မြန်မာလူငယ်များမှာ ထိုင်းနိုင်ငံသို့ နီးစပ်ရာ နယ်စပ်ထွက်ပေါက်များမှ တရားမဝင် ဖြတ်ကျော်နေကြ သလို တရားဝင်လမ်းကြောင်းမှလာရန် ရန်ကုန်ရှိ ထိုင်းသံရုံး၌ ဗီဇာတန်းစီသူ နေ့စဉ်ထောင်နှင့်ချီ၍ ရှိနေကြောင်း ဒေသခံ များထံမှ သိရသည်။

စစ်မှုထမ်းဥပဒေကြောင့် ပြည်ပထွက်ရန် စီစဉ်နေသူများက ရွှေရောင်းချမှုများရှိလာ၍ ပြည်တွင်းရွှေဈေးကွက်၌ ၁ ကျပ်သား လျှင် ကျပ် ၃၉ သိန်း ဝန်းကျင်အထိ မြင့်တက်လာကြောင်း ရွှေလုပ်ငန်းရှင်များထံမှ သိရသည်။

ရန်ကုန်မှ ရွှေဆိုင်ပိုင်ရှင်တဦးက “ရွှေဈေးကတော့မာတယ်၊ သိပ်မကျဘူး။ ဈေးကွက်အခြေအနေက မကောင်းဘူး။ ရန်ကုန် ရော၊ မန္တလေးမှာပါ ဖမ်းဆီးခေါ်ယူစစ်ဆေးနေတာ ရှိတယ်။ ရွှေကုန်သည်ကြီးတွေနဲ့ နာမည်ကြီး ရွှေဆိုင်တွေပါတယ်။ အတုံး လုပ်တဲ့ကုန်သည်တွေအဓိကပေါ့။ အားလုံးဂယက်ရိုက်တဲ့ စစ်မှုထမ်းဥပဒေကလည်း အကုန်လုံးကို ထိတာကိုး။ အရောင်း အဝယ်ကိုပါ ထိတယ်”ဟု ဧရာဝတီသို့ ပြောသည်။

အာဏာသိမ်းပြီး နောက်ပိုင်း ဈေးကွက်အတွင်း ဖမ်းဆီးစစ်ဆေးမှုများကြောင့် အကယ်ဒမီ အခေါက်ရွှေ အရောင်းအဝယ်မှာ မှောင်ခိုဈေးကွက်ဖြစ်နေပြီး စစ်ကောင်စီကလည်း ရန်ကုန်၊ မန္တလေးရှိ ရွှေကုန်သည် လုပ်ငန်းရှင်ကြီးများကို မကြာခဏ နေပြည်တော်သို့ ခေါ်ယူတွေ့ဆုံလေ့ရှိကြောင်း ရွှေလုပ်ငန်းရှင် အသိုင်းအဝိုင်းမှ သိရသည်။

စစ်ကောင်စီ လက်အောက်ရှိ ရန်ကုန်တိုင်းရွှေလုပ်ငန်းရှင်များအသင်း (YGEA) ရုံးတွင် အကယ်ဒမီအခေါက်ရွှေ ၁ ကျပ်သား မှာ ၃၆ သိန်း ၅ သောင်းကျော်သာ ရှိသော်လည်း ပြင်ပအကယ်ဒမီအခေါက်ရွှေဈေးမှာ ၁ ကျပ် သားလျှင် ကျပ် ၃၉ သိန်း အထိ မြင့်တက်နေသဖြင့် သတ်မှတ်ဈေးနှင့် ကျပ် ၂ သိန်းကျော် ကွာဟနေသည်။

တရားမဝင် ငွေလွှဲလုပ်ငန်းများ ပပျောက်စေရန် စစ်ကောင်စီ၏ အထွေထွေအုပ်ချုပ်ရေးဦးစီးဌာန၊ အထူးစုံစမ်း စစ်ဆေးရေး ဌာန (စသုံးလုံး) နှင့် ငွေကြေးဆိုင်ရာ စုံစမ်းထောက်လှမ်းရေးအဖွဲ့များ ပါဝင်သည့် ပူးပေါင်းအဖွဲ့က စုံစမ်းဖော်ထုတ်ပြီး သံသယရှိသူ ၄၀ ဦးကို အရေးယူထားကြောင်း ပြီးခဲ့သည့် ဇန်နဝါရီ ၈ ရက် ရက်စွဲဖြင့် ဗဟိုဘဏ်က ထုတ်ပြန်ထား သော်လည်း ယခုလတ်တလော ဖမ်းဆီးမှုများနှင့် ပတ်သက်၍ စစ်ကောင်စီဘက်မှ တစုံတရာ ထုတ်ပြန်ခြင်း မရှိသေးပေ။