လွိုင်ကော် တက္ကသိုလ်မှ Non-CDM ဝန်ထမ်းများကို ကရင်နီတော်လှန်ရေးတပ်ပေါင်းစု ကယ်တင်ထား
▪︎Non-CDM များအတွက် အစားအသောက်နှင့်ရေကို CDMဝန်ထမ်းများ ကူညီ
သတိုး/People’s Spring
ကရင်နီ (ကယား)ပြည်နယ်တွင် ၁၁.၁၁ စစ်ဆင်ရေးစတင်ချိန်၌ စစ်ကောင်စီ၏ စွန့်ပစ်ခြင်းခံခဲ့ရရသော လွိုင်ကော်တက္ကသိုလ်မှ Non-CDM ဝန်ထမ်းများနှင့် မိသားစုဝင်များကို ကရင်နီတော်လှန်ရေးတပ်ပေါင်းစုမှ ကယ်တင်ပေးခဲ့ကြောင်း ကရင်နီပြည်ကြားကာလအုပ်ချုပ်ရေးကောင်စီ (IEC)၏ ပြည်ထဲရေးဝန်ကြီးဌာနက အသိပေးထားသည်။
လွိုင်ကော်တက္ကသိုလ်မှ Non-CDM ဝန်ထမ်း ၁၃၄ ဦးနှင့် ၎င်းတို့၏မိသားစုဝင် ၆၄ ဦးကို လူသားချင်းစာနာထောက်ထားရေး ၊ လူ့အခွင့်အရေးများနှင့်အညီ ပြည်ထဲရေးဝန်ကြီးဌာန၌ ဘေးကင်းလုံခြုံစွာ စောင့်ရှောက်ထားကြောင်း နိုဝင်ဘာ ၁၄ ရက်တွင် သတင်းထုတ်ပြန်သည်။
စစ်ကောင်စီဝါဒဖြန့် တယ်လီဂရန်ချန်နယ်များတွင် လွိုင်ကော်တက္ကသိုလ်ပါမောက္ခချုပ်ကို တော်လှန်ရေးအဖွဲ့များက ပစ်သတ်၍ ဆရာ၊ဆရာမ ၃၈ဦးကို ဓားစာခံအဖြစ် ဖမ်းဆီးသွားကြောင်းသတင်းအမှား ထုတ်လွှင့်နေကြသည်။
သို့သော် ကရင်နီတပ်ပေါင်းစုက ကယ်တင်ခဲ့သည့် Non-CDM ထဲတွင် လွိုင်ကော်တက္ကသိုလ်ပါမောက္ခချုပ် လည်းပါဝင်ပြီးကောင်းမွန်စွာစောင့်ရှောက်ထားကာမိသားစုနှင့်အဆက်အသွယ်ရအောင် ဆောင်ရွက်ပေးထားကြောင်း KNDF ဥက္ကဌ ခွန်ဘီထူးက ဖက်ဒရယ်FM ကို ဖြေကြားထားသည်။
ထို့ပြင် အဆိုပါ Non-CDM ဝန်ထမ်းများအတွက် အစားအသောက် နှင့် သောက်သုံးရေကို CDM ဝန်ထမ်းများကို ကူညီပေးနေသည်ဟုသိရပြီး Non-CDM များအတွက်ပေးထားသည့် ရေသန့်ဘူးများပေါ်၌ “CDM တရားသူကြီး နှင့်ရှေ့နေများမှလှူဒါန်းသည်။””CDM ထွေအုပ်ဝန်ထမ်းများမှ လှူဒါန်းသည်။””CDM ဆရာဝန်မှလှူဒါန်းသည်။””CDM သူနာပြုမှ လှူဒါန်းသည်။”ဟု ရေးသားထားသည်ကို တွေ့ရသည်။
ကရင်နီတော်လှန်ရေးတပ်ပေါင်းစုအဖွဲ့များ ဖြစ်သည့် ကရင်နီတပ်မတော် KA ၊ KNDF ၊ KNPLF ၊ DMO PDF ၊ Loikaw PDF ၊ မိုးဗြဲ PDF ၊ ဖယ်ခုံ PDF ၊ မြို့ပြပျောက်ကျားတပ် နှင့် ရှမ်းတောင် PDF တို့ ပါဝင်သော 11.11 OPERATION ကို နိုဝင်ဘာ ၁၁ရက်တွင် စတင်ခဲ့ပြီး လွိုင်ကော်၊ မိုးဗြဲ၊ဖယ်ခုံ၊ ဒီးမော့ဆို မြို့နယ်များရှိ စစ်တပ်စခန်းနှင့်တပ်စွဲရာနေရာ ၂၀ ထက်မနည်းသိမ်းပိုက်ထားနိုင်ကြောင်း KNDF ဥက္ကဌ ခွန်ဘီထူးက လူထုနွေဦးသို့ ပြောကြားထားသည်။
လွိုင်ကော်တက္ကသိုလ်တွင် တပ်စွဲထားသော စစ်ကောင်စီတပ်တပ်မ ၆၆ လက်အောက်ခံ ခြေမြန်တပ်ရင်းနှစ်ရင်းကို ကရင်နီတပ်ပေါင်းစုက တိုက်ခိုက်ရာ တပ်ရင်း နှစ်ရင်းလုံးရှုံးနိမ့်ခဲ့သည်။
တပ်ရင်းမှူးအပါအဝင်စစ်ကောင်စီတပ်သား ၁၁၀ သေဆုံးပြီး ၃၂ ဦးလက်နက်ချကာ ၊ လက်နက်မျိုးစုံ ၁၂၀ကျော်နှင့်ခဲယမ်းများစွာသိမ်းဆည်းရရှိကြောင်း KNDFက ထုတ်ပြန်သည်။
(လွိုင်ကော်တက္ကသိုလ်မှ Non-CDM ဝန်ထမ်းများနှင့်မိသားစုဝင်များကို ကရင်နီတပ်ပေါင်းစုက ကယ်ထုတ်ပေးနေစဥ်နှင့် CDM ဝန်ထမ်းများက Non-CDM ဝန်ထမ်းများ အတွက် သောက်သုံးရေ ကူညီပေးထားမှု။ ဓာတ်ပုံ-IEC ၊ Federal FM
