မောင်တောမြို့၊ တောင်ပြို (လက်ယာ) စခန်းကို AA က တိုက်ခိုက်သိမ်းပိုက်ပြီးနောက် စစ်ကောင်စီတပ်ဖွဲ့ဝင် ၅၈ ဦး ဘင်္ဂလားဒေ့ရှ်နိုင်ငံထဲသို့ ထွက်ပြေး (ရုပ်/သံ)
■ ထွက်ပြေးလာသည့် စစ်ကောင်စီတပ်ဖွဲ့ဝင်များကို မြန်မာနိုင်ငံသို့ ပြန်ပို့ရေး ဆွေးနွေးနေဟု ဘင်္ဂလားဒေ့ရှ် ပြည်ထဲရေးဝန်ကြီးပြောဆို
ရန်ကုန်၊ ဖေဖော်ဝါရီ ၅
ရခိုင်ပြည်နယ်၊ မောင်တောမြို့နယ်၊ တောင်ပြို(လက်ယာ)စခန်းကို ရက္ခိုင့်တပ်တော်AA က တိုက်ခိုက်သိမ်းပိုက်ပြီးနောက် စစ်ကောင်စီတပ်ဖွဲ့ဝင် ၅၈ ဦး ဘင်္ဂလားဒေ့ရှ်နိုင်ငံထဲသို့ ထွက်ပြေးသွားကြောင်း ညီနောင် မဟာမိတ် ၃ ဖွဲ့က တရားဝင် သတင်းထုတ်ပြန်သည်။
ဖေဖော်ဝါရီလ ၄ ရက်နေ့တွင် စစ်ကောင်စီ၏ နယ်ခြားစောင့်တပ်စခန်းတစ်ခုဖြစ်သော ဘင်္ဂလာ-ရက္ခိုင်နယ်စပ်၊ မောင်တောမြို့ရှိ တောင်ပြို (လက်ဝဲ-လက်ယာ) စခန်း ၂ ခုကို ရက္ခိုင့်တပ်တော်က ထိုးစစ်ဆင်တိုက်ခိုက်ခဲ့ကြောင်း၊ တောင်ပြို (လက်ယာ) စခန်းကို ညနေ ၆ နာရီခန့်အချိန် အပြီးသတ်သိမ်းပိုက်နိုင်ခဲ့ကြောင်း၊ တောင်ပြို (လက်ဝဲ) စခန်းကို ဆက်၍ထိုးစစ်ဆင်တိုက်ခိုက်လျက်ရှိကြောင်း သိရှိရသည်။
တောင်ပြို (လက်ဝဲ) စခန်းမှ စစ်ကောင်စီတပ်ဖွဲ့ဝင်များအနေဖြင့် လက်နက်ချအညံ့ခံပါက အသက်ချမ်းသာရာရမည်ဖြစ်ကြောင်း AAက သတိပေးလိုက်ပြီး တောင်ပြို (လက်ယာ) စခန်းသိမ်းတိုက်ပွဲအတွင်း စစ်ကောင်စီတပ်ဖွဲ့၏ အလောင်းအမြောက်အမြားနှင့် လက်နက်ခဲယမ်းအမြောက်အမြား သိမ်းဆည်းရမိခဲ့ကြောင်း၊ AA ဘက်မှ လည်း တော်လှန်ရေး အာရက္ခစစ်သည်အချို့ တိုင်းပြည်နှင့် လူမျိုးအတွက် အသက်ပေးဆပ်စွန့်လွှတ်ခဲ့ရကြောင်း သိရှိရသည်။
AA က တိုက်ခိုက် သိမ်းပိုက်လိုက်သော တောင်ပြို(လက်ယာ)စခန်းမှ စစ်ကောင်စီ၏ နယ်ခြားစောင့်ရဲနှင့် စစ်ကောင်စီတပ်ဖွဲ့ဝင် စုစုပေါင်း ၆၀ နီးပါးသည် နယ်စပ်မှတစ်ဆင့် ဘင်္ဂလာဒေ့ရှ်နိုင်ငံအတွင်းသို့ ခိုးဝင်၍ လက်နက်များဖြင့် ထွက်ပြေးလွတ်မြောက်သွားခဲ့ကြကြောင်း သိရှိရသည်။
AA အနေဖြင့် ရက္ခိုင်ပြည်၊ မြောက်ဦး၊ မင်းပြားနှင့် ကျောက်တော်မြို့နယ်များတွင် စစ်ကောင်စီမှ လက်လွှတ်ဆုံးရှုံးရန် ရာနှုန်းပြည့်သေချာနေသော စခန်းအချို့အား အပြီးသတ်သိမ်းပိုက်ရယူနိုင်ရေးအတွက် ရက္ခိုင့်တပ်တော်မှ ဆက်လက်ထိုးစစ်ဆင်တိုက်ခိုက်လျက်ရှိကြောင်း သိရှိရသည်။
ဘင်္ဂလားဒေ့ရှ်အစိုးရ၊ ပြည်ထဲရေးဝန်ကြီး Asaduzzaman Khan Kamal က မြန်မာစစ်ကောင်စီတပ်ဖွဲ့ဝင်များကို ပြန်လည် ပို့ဆောင်ရန် လုပ်ဆောင်နေပြီဖြစ်ကြောင်း တရားဝင် ထုတ်ဖော်ပြောဆိုသည်။
“သူတို့ကို အချုပ်ထဲမှာ ထားပြီး နိုင်ငံခြားရေး ဝန်ကြီးဌာနကတဆင့် မြန်မာနိုင်ငံကို ပြန်ပို့ဖို့ လုပ်ငန်းစဉ်တွေ လုပ်ဆောင်နေပါတယ်။ ဒါပေမယ့် သူတို့တွေအနေနဲ့ ဘင်္ဂလားဒေ့ရှ်ထဲကို ဝင်မလာသင့်ပါဘူး။ ” ဟု ပြည်ထဲရေးဝန်ကြီး Asaduzzaman Khan Kamal က ပြောဆိုသည်။
စစ်ကောင်စီတပ်ဖွဲ့ဝင်များသည် တိုက်ပွဲများတွင် အရေးနိမ့် စစ်ရှုံးတိုင်း အိန္ဒိယ၊ တရုတ်နိုင်ငံများသို့ ထွက်ပြေးနေကြရာမှ ယခုအခါ ဘင်္ဂလားဒေ့ရှ်နိုင်ငံသို့ပါထွက်ပြေး တိမ်းရှောင်လာကြခြင်းဖြစ်ကြောင်း သိရှိရသည်။
