သေနတ်မရှိလို့ ဓားနဲ့ပိုင်းတဲ့ အညာ တော်လှန်ရေး ရဲဘော်
ဖေဖေါ်ဝါရီ – ၂၂
နွားကျောင်းသား ဟန်ဆောင်ပြီး စစ်အုပ်စုကို ငှက်ကြီးတောင် ဓါးနဲ့ ဝင်ပိုင်းကာ အသက်ပေးသွားတဲ့ တော်လှန်ရေး ရဲဘော် မင်းစိုး ကို ရွာသူရွာသားတွေနဲ့ ကျန်ရစ်သူ မိသားစုက သူရဲကောင်းအဖြစ် သတ်မှတ်ထားပါတယ်။
ပြီးခဲ့တဲ့ ၂၀၂၂ ဇူလိုင်(၃)ရက်က စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ် အရှေ့ခြမ်းက မင်းရွာ အပါအဝင် သံလမ်း အရှေ့ဘက် ရွာတွေကို စီးနင်းလုယက် မီးရှို့တဲ့ အင်အား(၁၃၀)ပါ စစ်အုပ်စုကို ဒေသခံ တော်လှန်ရေး အဖွဲ့တွေက ရရာလက်နက်နဲ့ ခုခံတိုက်ခိုက်ခဲ့ပါတယ်။
ကျည်ဆံပုံး ထမ်းပြီး မောင်းပြန်သေနတ် ကိုင်လာတဲ့ စစ်အုပ်စုကို လက်လုပ်သေနတ်နဲ့ ခုခံရင်း အဲ့ဒီ မင်းရွာ တိုက်ပွဲမှာ တော်လှန်ရေး ရဲဘော် စုစုပေါင်း(၁၁)ဦး ကျဆုံးခဲ့ပါတယ်။ ကျဆုံးသူတွေထဲ ဝက်လက်မြို့နယ် အရှေ့ခြမ်း ပကဖ၊ ဗိုလ်မင်းရောင် အဖွဲ့က တော်လှန်ရေး ရဲဘော် မင်းစိုးလည်း ပါဝင်ခဲ့ပါတယ်။
ရဲဘော် မင်းစိုးဟာ စစ်အုပ်စုကို ခုခံတိုက်ခိုက်ဖို့အတွက် လက်လုပ် သေနတ်တောင် မရှိလို့ နွားကျောင်းသား ဟန်ဆောင်ပြီး စစ်အုပ်စုထဲ ဝင်လုံးကာ နှစ်ယောက်ကို ငှက်ကြီးတောင်ဓားနဲ့ ပိုင်းခဲ့တာလို့ ဒေသခံတွေက ပြန်ပြောပြပါတယ်။
ဝက်လက်နယ်ထဲ ရွာမီးရှို့၊ လူသတ်၊ လုယက်နေတဲ့ စစ်အုပ်စုကို မယှဉ်နိုင်မှန်း မသိပေမယ့် သေနတ်မရှိလို့ မတိုက်ဘူးဆိုရင် ရာဇဝင်ရိုင်းမှာ စိုးလို့ အသေခံပြီး တိုက်ခိုက်ခဲ့ကြတာလို့ မင်းရွာ တိုက်ပွဲမှာ ပါဝင်ခဲ့သူ ဝက်လက်မြို့နယ် အရှေ့ခြမ်း ပကဖ အဖွဲ့ဝင် ရဲဘော် ဝင်းမိုးနိုင်ကလည်း ပြောပါတယ်။
လက်နက်မရှိလို့ မသွားဖို့ တားမြစ်ခဲ့ပေမယ့် တားမရခဲ့ဘူးလို့ ရဲဘော်မင်းစိုးရဲ့ ညီမ ကလည်း ပြန်ပြောပြပါတယ်။ စစ်အုပ်စုဟာ ရဲဘော်မင်းစိုးကို သတ်ဖြတ်ပြီးနောက် ဖုန်းဆက်ပြီး ကျန်ရစ်သူ မိသားစုကို ခြိမ်းခြောက် ခဲ့သေးတယ်လို့ ဆိုပါတယ်။
ရဲဘော်မင်းစိုး ကျဆုံးချိန် လူမမယ်အရွယ် သားငယ်နဲ့ ဇနီးသည်တို့ ကျန်ရစ်ခဲ့ပါတယ်။ လက်ရှိမှာ ကျန်ရစ်သူ ဇနီးသည်က ကြုံရာကျပန်း လုပ်ကိုင်စားသောက်ရင်း တော်လှန်ရေးအတွက် နိုင်ရာဝန် ထမ်းနေဆဲပါ။
ပြီးခဲ့တဲ့ အောက်တိုဘာမှာ စတင်ခဲ့တဲ့ ညီနောင်သုံးဖွဲ့ရဲ့ ၁၀၂၇ စစ်ဆင်ရေးနဲ့အတူ နိုင်ငံတဝန်းမှာ တော်လှန်ရေး တပ်တွေက မြို့သိမ်း၊ စခန်းသိမ်း တိုက်ပွဲတွေ ဖော်ဆောင်ပြီး အောင်မြင်မှု ရနေတာတွေ ရဲဘော် မင်းစိုးကို မြင်စေချင်တယ်လို့ ရဲဘော်မင်းစိုးရဲ့ ယောက်ဖတော်သူ၊ ကိုမျိုးမြင့်ကလည်း အခုလို ပြောပါတယ်။
ရဲဘော်မင်းစိုး အပါအဝင် နိုင်ငံတဝန်းမှာ ဖက်ဆစ်တပ် အမြစ်ဖြတ်ရေး တိုက်ပွဲဝင်ရင်း လူမသိ သူမသိ ကျဆုံးခဲ့တဲ့ တော်လှန်ရေး ရဲဘော်တွေ ဒုနဲ့ဒေး ရှိနေပါပြီ။
ဒါပေမယ့် ဝက်လက်နယ် အပါအဝင် အညာက တော်လှန်ရေး ရဲဘော်တွေကတော့ လက်နက်ခဲယမ်း မပြည့်စုံတဲ့ကြားကပဲ စစ်အာဏာရှင် အမြစ်ပြတ်ရေး ဆက်လက် တိုက်ပွဲဝင်နေကြဆဲပါ။
ဝက်လက်မြို့နယ် အရှေ့ခြမ်း ပကဖ အဖွဲ့ဝင် ရဲဘော် ဝင်းမိုးနိုင် ကတော့ မောင်းပြန်သေနတ်ကိုင်ပြီး မင်းစိုး အတွက် သွေးကြွေး ပြန်ဆပ်ပေးချင်သေးတယ်လို့ ပြောပါတယ်။
ငှက်ကြီးတောင်ဓားကိုင်ပြီး အသေခံ တိုက်ပွဲဝင်သွားတဲ့ ရဲဘော်မင်းစိုးရဲ့ သတ္တိမျိုးက လူ(၁၀၀၀)မှာ တစ်ယောက် မရှိနိုင်ဘူးလို့ ဒေသခံတွေက ချီးကျူးပါတယ်။
တင်ဆက် – မှူးအိန်ဂျယ်လ်၊ ရိုက်ကူး – ထွန်းတောက်
