||Breaking News||
စစ်ကောင်စီစစ်ကိုင်းတိုင်းဝန်ကြီးချုပ်ယာဥ်တန်းတိုက်ခိုက်ခံရ၊စစ်ဗိုလ် ၁ ဦးသေပြီး မိုင်းထိသောမာစီးဒီးကားကိုထားခဲ့
▪︎အဆိုပါယာဥ်တန်းတွင် စစ်ကောင်စီပြန်ကြားရေးတာဝန်ခံဗိုလ်ချုပ်ဇော်မင်းထွန်းပါရှိကြောင်းသတင်းထွက်ပေါ်နေသော်လည်း အတည်မပြုနိုင်သေး
ယောနသံ/People’s Spring
စစ်ကိုင်းမြို့ တိုင်းရင်းသားဒီကရီကောလိပ်မှ ပြန်လာသည့် စစ်ကောင်စီ၏ စစ်ကိုင်းတိုင်းဝန်ကြီးချုပ်နှင့် အရာရှိများလိုက်ပါလာသည့် ယာဉ်တန်းအား တော်လှန်ရေးအဖွဲ့များ
ကယမန်နေ့( ဖေဖော်ဝါရီ ၂၂ရက်)နံနက်ပိုင်းက မိုင်းဆွဲတိုက်ခိုက်ရာ ကားတစ်စီး ပျက်စီးပြီး စစ်ဗိုလ်တစ်ဦးသေဆုံးသွားကြောင်း သတင်းရရှိသည်။
“တိုင်းရင်းသားဒီကရီကောလိပ်ကအပြန် မိုင်းဆွဲတိုက်ခိုက်တာမှန်တယ်။ ဗိုလ်တစ်ယောက်သေတယ်။ ကားပျက်စီးတယ်” ဟု ဒေသကာကွယ်ရေးရဲဘော်တစ်ဦးက People’s Spring သို့ပြောသည်။
အဆိုပါယာဉ်တန်း၌ စစ်ကောင်စီအတွက် အဓိက ဝါဒဖြန်ချီပြောကြားပေးနေသူ စစ်ကောင်စီ ပြန်ကြားရေးတာဝန်ခံ ဗိုလ်ချုပ်ဇော်မင်းထွန်းပါဝင်ကြောင်း သတင်းထွက်ပေါ်နေသော်လည်း People’s Spring ကသီးခြားအတည်မပြုနိုင်သေးပါ။
သို့သော်အဆိုပါယာဉ်တန်းတွင် ဗိုလ်ချုပ်ဇော်မင်းထွန်းပါ
အတည်ပြုမရသေးသေးသော်လည်း စစ်ကောင်စီ စစ်ကိုင်းတိုင်းဝန်ကြီးချုပ်ဦးမြတ်ကျော်၊ နယ်စပ်ရေးရာဝန်ကြီးဌာန ဒုတိယဝန်ကြီး ဗိုလ်ချုပ်ဖြိုးသန့်၊ စစ်ကိုင်းတိုင်းလုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးဝင်းတင်စိုးတို့ ပါဝင်သည်ဟု စုံစမ်းသိရသည်။
မိုင်းဆွဲတိုက်ခိုက်မှုတွင် စစ်ဗိုလ် ၂ ဦးသေဆုံးကြောင်း
စစ်ရေးသတင်းရင်းမြစ်အချို့က ပြောသော်လည်းဒေသခံ အချို့က ၁ ဦးသေကြောင်းပြောသည်။
စစ်ကိုင်းမြို့ခံတစ်ဦးက ” ဇော်မင်းထွန်းပါမပါ မသိဘူး။ ဒါပေမယ့်မိုင်းဆွဲတိုက်ခိုက်တာ ဟုတ်တယ်။စခဗိုလ် နှစ်ယောက်သေတာမဟုတ်ဘူး။တစ်ယောက်သေတာ”ဟု ပြောသည်။
မိုင်းဆွဲခံရပြီး ပျက်စီးသွားသော ကားကို ထားခဲ့ပြီးစစ်ကိုင်းမြို့ဘက်သို့ ဆက်လက်မောင်းနှင်သွားသည်ဟု သတင်းရရှိသည်။ ပျက်စီးသွားသောကားမှာ နာမည်ကြီးအမျိုးအစားဖြစ်သော မာစီးဒီး ကားဖြစ်ပြီး ကားမှာမိုင်းထိထား၍ ပျက်စီးနေသည်ကိုတွေ့ရသည်။
စစ်ကောင်စီယာဥ်တန်းကိုမည့်သည့်တော်လှန်ရေးအဖွဲ့ကတိုက်ခိုက်သည်ကို မသိရသေးပေ ။ အဆိုပါယာဥ်တန်းတိုက်ခိုက်ခံရပြီးနောက် မန္တလေး-မုံရွာကားလမ်းရှိအဆိုပါလမ်းပိုင်း ပိတ်၍ ကားများလှည့်ပြန်နေရကြောင်း ကားသမားများကပြောသည်။
ထိုအပြင် မုံရွာ – မန္တလေးလမ်းပိုင်းအား ဖေဖော်ဝါရီ ၂၃ ရက်နံနက် ၁၁ နာရီ ခန့်မှစ၍ အရေးပေါ်ပိတ်ကြောင်း ဒေသ ခံတော်လှန်ရေးအဖွဲ့များ၏ သတိပေးချက်များထုတ်ပြန်ပေးနေသော Monywa Road Information -MRI က ထုတ်ပြန်လာသည်။
(ယာဥ်တန်းမိုင်းထိပြီး ပျက်စီ၍ ထားခဲ့သော မာစီးဒီးကား။ဓါတ်ပုံ-CJ )
