ညီနောင်မဟာမိတ်သုံးဖွဲ့နှင့် စစ်ကောင်စီတွေ့ဆုံမှု သဘောတူညီချက် ဘာမှမရ
တွေ့ဆုံမှုသည် ၁၀ မိနစ်ခန့်သာ ကြာမြှင့်ခဲ့
ဒီဇင်ဘာလ ၁၂ ရက်
ရှမ်းပြည်နယ်မြောက်ပိုင်းတွင် “၁၀၂၇ စစ်ဆင်ရေး” ဖော်ဆောင်နေသည့် ညီနောင်မဟာမိတ်သုံးဖွဲ့နှင့် အာဏာသိမ်းစစ်ကောင်စီအကြား ယမန်နေ့က တွေ့ဆုံဆွေးနွေးမှုတွင် မည်သည့်သဘောတူညီချက်မှ မရရှိခဲ့ကြောင်း ညီနောင်မဟာမိတ်သုံးဖွဲ့နှင့် နီးစပ်သူတဦးကပြောသည်။
တွေ့ဆုံမှုသည် ၁၀ မိနစ်ခန့်သာ ကြာမြှင့်ခဲ့ပြီး လက်ရှိဖြစ်ပွားနေသည့် ရှမ်းပြည်မြောက်ပိုင်းက တိုက်ပွဲများအား နိုင်ငံရေးအရ ဖြေရှင်းနိုင်ရေး တရုတ်နိုင်ငံ၏ ကြားဝင်မှုဖြင့် ဆွေးနွေးခဲ့ကြခြင်းဖြစ်သည်။
ထိုတွေ့ဆုံမှုတွင် စစ်ကောင်စီဘက်က အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှုကော်မတီဥက္ကဌ ဗိုလ်ချုပ်ကြီး ရာပြည့်က ဦးဆောင်ခဲ့ပြီး ညီနောင်မဟာမိတ်သုံးဖွဲ့ဖြစ်သည့် မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)၊ ရက္ခိုင့် တပ်တော်(AA)နှင့် တအာင်း(ပလောင်)အမျိုးသားလွတ်မြောက်ရေးတပ်မတော်(TNLA)တို့နှင့်တွေ့ဆုံခဲ့ခြင်းဖြစ်ကြောင်း စစ်ကောင်စီသတင်းထုတ်ပြန်ထားသည်။
ယခုလကုန်ပိုင်းတွင် ထပ်မံတွေ့ဆုံရန် ရှိကြောင်းလည်း စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောသည်။
တွေ့ဆုံမှုတွင် MNDAA ၏ စစ်ရေးပစ်မှတ်တခုဖြစ်သည့် လောက်ကိုင်မြို့အား ထိန်းချုပ်ခွင့်နှင့် စစ်ကောင်စီတပ်များ ပြန်လည်ဆုတ်ခွာ ရေး စစ်ကောင်စီနှင့် MNDAA တို့အကြား ယာယီအပစ်အခတ်ရပ်စဲရေးသဘောတူညီခဲ့ကြောင်း သတင်းဖော်ပြမှုများရှိနေသော်လည်း ထိုသဘောတူညီချက်သတင်းနှင့်ပတ်သက်ပြီး ညီနောင်မဟာမိတ်သုံးဖွဲ့ဘက်ကမူ မည်သည့်သတင်းထုတ်ပြန်ချက်မှ မထုတ်ပြန်သေးပေ။
အစည်းအဝေးနှင့် နီးစပ်သူတဦးက အစည်းအဝေးသို့ MNDAA တဖွဲ့သာ ရွေးဖိတ်သော်လည်း မဟာမိတ်ညီနောင် ၃ ဖွဲ့လုံးမှ အတွင်းရေးမှူးများ အတူတကွ တက်ရောက်ကြောင်း ဧရာဝတီသို့ ပြောသည်။ ဆိုရှယ်မီဒီယာတွင် ပြန့်နေသော စစ်တပ်ကို လောက်ကိုင်မြို့မှ ဆုတ်ခွါခွင့်ပေးရန် ဒီဇင်ဘာလကုန်ထိ အပစ်ရပ်မည်ဆိုသည်မှာ မဟုတ်ကြောင်းလည်း ဆိုသည်။ “စစ်တပ်ဘက်က လူတွေ ကြည့်ရတာ ခပ်မာမာပဲ၊ သူတို့ စစ်ရှုံးနေတယ်လို့ ယူဆနေပုံ မပေါ်ဘူး” ဟု ၎င်းက ဧရာဝတီသို့ ပြောသည်။
ဧရာဝတီအနေဖြင့် အစည်းအဝေးရလဒ်အကြောင်း မေးမြန်းရာ TNLA ပြောရေးဆိုခွင့်ရှိသူ တားအိုက်ကျော်က “ အဲ့ဒီကိစ္စကတော့ ကျနော်လည်းမသိရဘူး၊ တွေ့ဆုံမှုရှိမရှိ၊ ဖြစ်မဖြစ်ဆိုတာလည်း မသိရသေးဘူး၊ မြေပြင်မှာတော့ တိုက်ပွဲကတောက်လျှောက်ဖြစ်နေသေးတယ်၊ စစ်ကောင်စီက လေယာဉ်တွေနဲ့ လက်နက်ကြီးတွေနဲ့ ပစ်ခတ်နေတယ်” ဟု ပြောသည်။
လက်ရှိတွင် ရှမ်းပြည်မြောက်ပိုင်း၊ TNLA စစ်ဆင်ရေးဖော်ဆောင်နေသည့် လားရှိုး၊ နမ့်ခမ်းနှင့် နမ့်ခမ်းမြို့နယ်တို့တွင် တိုက်ပွဲများဆက်လက်ဖြစ်ပွားနေကြောင်းလည်း ၎င်းကပြောသည်။
တချိန်တည်းတွင်ပင် ချင်းပြည်နယ် ပလက်ဝမြို့နယ်အတွင်း စစ်ကောင်စီ၏ အခိုင်အမာ စခန်းတခုဖြစ်သည့် နှုံးဘူးဗျူဟာကုန်းအား ရက္ခိုင့်တပ်တော် (AA) က ဒီဇင်ဘာ ၁၀ ရက် ည ၁၁ နာရီခန့်တွင် အပြီးသတ် တိုက်ခိုက် သိမ်းပိုက်ရရှိခဲ့ကြောင်း သတင်းထုတ်ပြန်သည်။
ညီနောင်မဟာမိတ်သုံးဖွဲ့၏ “ ၁၀၂၇ စစ်ဆင်ရေး” တလကျော်ကြာကာလအတွင်း ရှမ်းပြည်မြောက်ပိုင်းရှိ အချက်အချာမြို့များနှင့် မြန်မာ-တရုတ်နယ်စပ် ကုန်သွယ်ရေးဂိတ်များအား သိမ်းပိုက်ထားနိုင်ခဲ့ပြီး နိုင်ငံတဝန်းရှိ အခြား စစ်ကောင်စီဆန့်ကျင်ရေး လက်နက်ကိုင်တပ်ဖွဲ့များကလည်း သက်ဆိုင်ရာနယ်မြေများတွင် စစ်ကောင်စီတပ်စခန်းများကို ထိုးစစ်ဆင်ခဲ့ကြသည်။
ပြီးခဲ့သည့်ရက်ပိုင်းက စစ်ကောင်စီနိုင်ငံခြားရေးဝန်ကြီး ဦးသန်းဆွေသည် တရုတ်နိုင်ငံခြားရေးဝန်ကြီး ဝမ်ယိနှင့် ပေကျင်းတွင်တွေ့ ဆုံခဲ့ရာ ရှမ်းမြောက်စစ်ပွဲရပ်ဆိုင်းရေး တရုတ်ကြားဝင်ရန် ကမ်းလှမ်းခဲ့အပြီး ယခုဆွေးနွေးပွဲဖြစ်မြောက်လာခြင်းဖြစ်သည်။
တရုတ်နိုင်ငံက ကိုးကန့်ဒေသအာဏာပိုင် မိသားစုများဖြစ်သည့် ကိုးကန့်နယ်ခြားစောင့်တပ် တည်ထောင်သူ ပယ်ဆောက်ချိန်နှင့် လက်ရှိနယ်ခြားစောင့်တပ်ခေါင်းဆောင်ဖြစ်သည့် ပယ်ဆောက်ချိန်သား ပယ်ရင်ချန်နှင့် နယ်ခြားစောင့်တပ် ခေါင်းဆောင်ဟောင်းဖြစ်သူ ဝေဆန်းအပါအဝင် ဆယ်ဦးအား အွန်လိုင်းငွေကြေးလိမ်းလည်မှုများနှင့်ပတ်သက်ပြီး ဖမ်းဝရမ်းထုတ်လိုက်သည်။
နိုဝင်ဘာလအတွင်းက တရုတ်က ဖမ်းဝရမ်းထုတ်လိုက်သည့် ကိုးကန့်ဒေသဦးစီးအဖွဲ့ဝင်ဟောင်း မြင်ရွှေချမ်းမိသားစုအား စစ်ကောင်စီက ဖမ်းဆီးကာ တရုတ်ထံလွှဲအပ်ပေးရာ မြင်ရွှေချမ်းမှာ မိမိကိုယ် သေနတ်ဖြင့်ပစ်ကာ သက်သေသွားခဲ့ကြောင်း စစ်ကောင်စီက သတင်းထုတ်ပြန်ခဲ့သည်။
ညီနောင်မဟာမိတ်သုံးဖွဲ့ စတင်သည့် “ ၁၀၂၇ စစ်ဆင်ရေး”သည် စစ်အာဏာရှင် အမြစ်ဖြတ်တိုက်ဖျက်ရေးနှင့် အွန်လိုင်းငွေကြေးလိမ်လည်မှုလုပ်ငန်းများ တိုက်ဖျက်ရေးဖြစ်ကြောင်း ၎င်းတို့က ကြေညာထားသည်။
ပုံ- ညီနောင်မဟာမိတ်သုံးဖွဲ့နှင့် အာဏာသိမ်းစစ်ကောင်စီအကြားဒီဇင်ဘာ ၁၁ ရက်နေ့က တွေ့ဆုံဆွေးနွေးမှု
